ახალი ამბები

უშიშროების საბჭოს მდივნად ირინა იმერლიშვილი ინიშნება. როგორც დეპუტატმა "ინტერპრესნიუსს" განუცხადა, შეთავაზება მიღებული აქვს და თანხმობაც განაცხადა. 
"მას შემდეგ, რაც 17 ნოემბრიდან გვეყოლება ახალი პრეზიდენტი, იგი დანიშნავს უშიშროების საბჭოს მდივანს. მე ეს შეთავაზება მიღებული მაქვს და თანხმობაც უკვე განვაცხადე", - აღნიშნა ირინა იმერლიშვილმა. 
ირინა იმერლიშვილი უშიშროების საბჭოს მდივნის თანამდებობაზე გიგა ბოკერიას შეცვლის, რომელმაც განაცხადა, რომ პოსტიდან ინაუგურაციამდე გადადგება.

პრეზიდენტის ადმინისტრაციის მომავალი უფროსი ჟურნალისტებს ურჩევს, უშიშროების საბჭოს ახალი მდივნის შესახებ კითხვა ირინა იმერლიშვილს დაუსვან. აღნიშნული კომენტარი ლაშა აბაშიძემ მას შემდეგ გააკეთა, რაც ჟურნალისტებმა ჰკითხეს, ვინ იქნება უშიშროების საბჭოს ახალი ხელმძღვანელი. 
"გირჩევთ, ამის შესახებ ირინა იმერლიშვილს ჰკითხოთ", - განაცხადა ლაშა აბაშიძემ. 

ახალი პრეზიდენტის ინაუგურაციის შემდეგ პრეზიდენტის ადმინისტრაციაში რეორგანიზაცია განხორციელდება, - ამის შესახებ ჟურნალისტებს პრეზიდენტის ადმინისტრაციის მომავალმა უფროსმა ლაშა აბაშიძემ განუცხადა. მისივე განმარტებით, მათ ჰყავთ საკუთარი კვალიფიციური და კომპეტენტური გუნდი და რესტრუქტურიზაციის შემდეგ ადმინისტრაცია ახალი კადრებით დაკომპლექტდება.