ახალი ამბები

ირაკლი ღარიბაშვილის შემცვლელის შესახებ საუბარი ჯერჯერობით არ ყოფილა, - ამის შესახებ უშიშროების საბჭოს მომავალმა მდივანმა ირინა იმერლიშვილმა განაცხადა. 
დეპუტატის განმარტებით, შემცვლელის შერჩევის უფლებამოსილება ბიძინა ივანიშვილმა ირაკლი ღარიბაშვილს მიანიჭა, რადგან იგი ამ სისტემას ყველაზე კარგად იცნობს. 

საპარლამენტო უმრავლესობის ლიდერი "ქართული ოცნება - დემოკრატიული საქართველოს" ყრილობაზე პარტიის თავმჯდომარედ ირაკლი ღარიბაშვილის არჩევის საკითხს დააყენებს , - ამის შესახებ დავით საგანელიძემ ჟურნალისტებს ირაკლი ღარიბაშვილის წარდგენის შემდეგ განუცხადა. 
საგანელიძე მიიჩნევს, რომ პარტიისთვის ძალიან კარგია, როდესაც მისი თავმჯდომარე აღმასრულებელი სტრუქტურის ხელმძღვანელია. 

ამაყი ვარ, რომ კოალიცია "ქართულმა ოცნებამ" ორი წლის განმავლობაში ყველა დანაპირები შეასრულა, - ამის შესახებ პარლამენტის თავმჯდომარე დავით უსუფაშვილმა ირაკლი ღარიბაშვილის წარდგენის შემდეგ განაცხადა. 
მისი თქმით, ამ პერიოდის განმავლობაში მოხერხდა ისეთი პიროვნებების გამოვლენა, რომლებიც თავიანთ საქმეს ყველაზე უკეთ შეეფერებიან. 

საქართველოს მთავრობას სათავეში წესიერი და გულანთებული ადამიანი ჩაუდგება, - ამის შესახებ თავდაცვის მინისტრმა ირაკლი ალასანიამ ირაკლი ღარიბაშვილის პრემიერად წარდგენის შემდეგ განაცხადა. 
მისსივე თქმით, მოხარულია, რომ გუნდიდან შერჩეულია წესიერი, ღირსეული და ენერგიული ადამიანი. 
"ჩვენ ყველანი მას გვერდში დავუდგებით", - განაცხადა ალასანიამ.

ირაკლი ღარიბაშვილი ჩვენი საზოგადოების გამორჩეული და ღირსეული წევრია, - ამის შესახებ ჟურნალისტებს საქართველოს ახლად არჩეულმა პრეზიდენტმა გიორგი მარგველაშვილმა განუცხადა. 
მისი თქმით, ირაკლი ღარიბაშვილთან კარგი ურთიერთობა აქვს. "ის მისაღებია ქართული საზოგადოებისთვის. არის ჩვენი საზოგადოების გამორჩეული წევრი, გამორჩეული ქართველი და მთავრობის გამორჩეული წევრი. მიხარია, რომ ძალიან კარგი კოლეგიური ურთიერთობა მექნება ირაკლისთან", -  აღნიშნა მარგველაშვილმა.

შინაგან საქმეთა მინისტრს ახალი პრემიერი ირაკლი ღარიბაშვილი დაასახელებს. ამის შესახებ დღეს კოალიცია "ქართული ოცნების" ოფისში ბიძინა ივანიშვილმა ჟურნალისტებს განუცხადა. 
მისივე თქმით, შინაგან საქმეთა მინისტრის თანამდებობას დაიკავებს ის პიროვნება, რომელსაც ირაკლი ღარიბაშვილი გადაწყვეტს. 

საქართველოს ახალი პრემიერ-მინსიტრი და მთავრობა ოფიციალურად 2013 წლის 17 ნოემბრის შემდეგ ეყოლება. სწორედ ამ დღეს გაიმართება ახლად არჩეული პრეზიდენტის, გიორგი მარგველაშვილის ინაუგურაცია , რის შემდეგაც მოქმედი მთავრობა უფლებამოსილებას მოიხსნის. 

საქართველოს ახალი პრემიერ-მინისტრი ახლანდელი შინაგან საქმეთა მინისტრი ირაკლი ღარიბაშვილი იქნება. ღარიბაშვილი  თავის შემცვლელად ბიძინა ივანიშვილმა რამდენიმე წუთის წინ დაასახელა. 
ირაკლი ღარიბაშვილი 1982 წლის 28 ივნისს თბილისში დაიბადა. 2005 წელს დაამთავრა ივანე ჯავახიშვილის სახელობის თბილისის სახელმწიფო უნივერსიტეტი, საერთაშორისო ურთიერთობების მაგისტრატურა; 2002-2004 წლებში - სორბონის უნივერსიტეტი Paris-I,