ახალი ამბები

საქართველოს ამომრჩეველთა საერთო რაოდენობა 3, 537, 719 მოქალაქეს შეადგენს. საქართველოს ცენტრალურ საარჩევნო კომისიაში, არჩევნებამდე 8 დღით ადრე, საინფორმაციო ბრიფინგი გაიმართა, სადაც ცესკო-ს სპიკერმა ეკატერინე აზარაშვილმა მედიას 27 ოქტომბრის პრეზიდენტის არჩევნებისთვის ამომრჩეველთა საერთო რაოდენობა გააცნო. 

კოალიცია "ქართული ოცნების" პრეზიდენტობის კანდიდატი გიორგი მარგველაშვილი მარნეულის მოსახლეობას პირადად პრემიერ-მინისტრმა ბიძინა ივანიშვილმა წარუდგინა. 
ივანიშვილმა მარნეულის მოსახლეობას კიდევ ერთხელ მოუწოდა, რომ საპრეზიდენტო არჩევნებზე ხმა გიორგი მარგველაშვილს მისცენ და ყველამ ნომერი 41 შემოხაზონ. ბიძინა ივანიშვილის განცხადებით, ბოლო პერიოდში ძალიან ბევრს საუბრობენ, რომ ის პოლიტიკიდან მიდის. 

საქართველოს პრეზიდენტმა მიხეილ სააკაშვილმა რაბათის ციხეში არსებული მაღაზია მოინახულა. როგორც პრეზიდენტმა განაცხადა, რაბათის ციხეში არსებული მაღაზიებიდან მხოლოდ ერთი მუშაობს. 
"შუქის, წყლის და კომუნალურ ხარჯებს ვინც იხდიდა, ადგილობრივმა მუნიციპალიტეტმა შეწყვიტა გადახდა. ბევრი მაღაზია წავიდა აქედან. დარჩა მარტო ერთი მესხური მაღაზია და ამისთვის მადლობა უნდა მეთქვა ამ ხალხისთვის, იმიტომ, რომ არ იყო სწორი და პირველ-ორ წელიწადს მთავრობა უნდა დაეხმაროს ბიზნესს, სხვაინარად ეს ვერ გაკეთდება.

თავდაცვის მინისტრი ირაკლი ალასანია არ გამორიცხავს, რომ ჯარისკაცების მოწამვლის ფაქტებთან დაკავშირებით საქმე საბოტაჟთან გვქონდეს. როგორც ალასანიამ ჟურნალისტებს განუცხადა, არ უნდა მოვლენებს გაასწროს, თუმცა აქვთ ინფორმაცია, რომ ბოლო პერიოდში განვითარებული მოლენები შესაძლოა, საბოტაჟს უკავშირდებოდეს.
"რაც შეეხება ბოლო პერიოდის მოვლენებს, გამოძიება მიმიდინარეობს რამდენადაც მაქვს ინფორმაცია, შეიძლება საბოტაჟთანაც გვქონდეს საქმე, მაგრამ მოვლენებს წინ არ გავასწრებთ. გამოძიება უახლოეს მომავალში დასრულდება. გამოძიებული საქმეების ნაწილი ჩვენ პროკურატურაში გადავაგზავნეთ და ნაწილს კი ჩვენ თვითონ ვიძიებთ", – განაცხადა ირაკლი ალასანიამ. 

პარტია "დემოკრატიული მოძრაობის" ლიდერმა, პრეზიდენტობის კანდიდატმა ნინო ბურჯანაძემ აჭარაში წინასაარჩევნო შეხვედრები დაასრულა. როგორც ბურჯანაძემ ბათუმში, ევროპის მოედანზე შეკრებილ მოსახლეობასთან შეხვედრისას განაცხადა, არავის მისცემს არჩევნების გაყალბების საშუალებას და ქვეყანას აღარასდროს ეყოლება ხელისუფალი, რომელიც საკუთარი მოქალაქეების ღირსებას შელახავს. 

კოალიცია "ქართული ოცნების" პრეზიდენტობის კანდიდატი გიორგი მარგველაშვილი გორის მოსახლეობას შეხვდა. გორში შემაჯამებელ შეხვედრაზე პრეზიდენტობის კანდიდატი მხარდამჭერებს პრემიერ-მინისტრმა ბიძინა ივანიშვილმა წარუდგინა და 27 ოქტომბერს გიორგი მარგველაშვილის მხარდაჭერისკენ მოუწოდა. 
როგორც ბიძინა ივანიშვილმა სიტყვით გამოსვლისას აღნიშნა, საქართველოში წელს პირველად ჩატარდება ევროპული არჩევნები და ქვეყანას ეყოლება ღირსეული პრეზიდენტი, რომელსაც არ აქვს მანიაკალური სწრაფვა ძალაუფლებისკენ, ის მოდის მხოლოდ ერთი მიზნით, რომ ემსახუროს თავის ხალხს და ქვეყანას.