ახალი ამბები

გოდერძის უღელეტხილზე უამინდობის გამო ავტომობილების მოძრაობა შეზღუდულია. 
როგორც "ინტერპრესნიუსს" რეგიონული განვითარებისა და ინფრასრუქტურის სამინისტროში განუცხადეს, მოძრაობა თოვლისა და ქარბუქის გამო შეფერხებულია. 
სამინისტროს საზოგადოებასთან ურთიერთობის სამსახურის ხელმძღვანელის, მაგდა პოპიაშვილის ინფორმაციით, შესაბამისი ტექნიკა უკვე მუშაობს და სავარაუდოდ მოძრაობის აღდგენა დღის მეორე ნახევარში შესაძლებელი იქნება. 

ფოთში, ზღვის სანაპიროს ნაბადის ტერიტორიაზე, ძლიერი ღელვის გამო ზღვამ ბორანი "სმატი" გამორიყა. 35 ვაგონით დატვირთული გემი ფოთის ნავსადგურიდან გუშინ გავიდა, გვიან ღამით კი ზღვის ღელვამ 6 ბალს მიაღწია, რის გამოც გემმა მართვა დაკარგა.
"მეორე ნავმისადგომთან იდგა ეს ბორანი, რომელიც მალტის დროშის ქვეშ ცურავს. ჩვეულებრივი, სატვირთო ოპერაციების დასრულების შემდეგ, 35 ვაგონით დატვირთული გავიდა ნავსადგურიდან.

ქუთაისის N2 საპყრობილეში გარდაცვლილი გოგი ძველაიას მამა შიმშილობის დაწყებას აპირებს. ამის შესახებ "ინტერპრესნიუსს" ძველაიების ოჯახის ადვოკატმა ლედი ტუკვაძემ განუცხადა. 
მისი თქმით, გარდაცვლილი არასრულწლოვანი პატიმრის ოჯახი სასჯელაღსრულების სამინისტროდან ვიდოფირების გადაცემას ითხოვს. 
"თუ შეთანხმება არ მოხდება, თენგიზ ძველაია ორშაბათიდან ქუთაისში, პარლამენტის შენობასთან შიმშილობის დაწყებას აპირებს", - აცხადებს ადვოკატი. 

პრეზიდენტის ადმინისტრაციაში დღეს შეწყალების კომისიის სხდომა გაიმართება. 
როგორც "ინტერპრესნიუსს" შეწყალების კომისიის თავმჯდომარემ ელენე თევდორაძემ განუცხადა, პრეზიდენტის მიერ შეწყალებულები საპყრობილეებს 25 ოქტომბრამდე დატოვებენ. 
თევდორაძის ინფორმაციით, შეწყალების კომისია, ხვალინდელ სხდომაზე, 400-მდე პატიმრის საქმეს განიხილავს, მათ შორის 48 ქალის და 7 არასრულწლოვნის საქმეა.