ახალი ამბები

"საქართველოს მილიარდერ პრემიერ-მინისტრს თანამდებობის დატოვება უნდა, მაგრამ დათმობს კი ძალაუფლებას?" – ამ სათაურით აქვეყნებს ბრიტანული The Guardian-ის საკვირაო გამოცემა The Observer შონ უოკერის სტატიას ბიძინა ივანიშვილზე. 
როგორც სტატიის ავტორი აღნიშნავს, მილიარდერი პრემიერ-მინისტრი ბიძინა ივანიშვილი, რომელსაც ხშირად აკრიტიკებენ, აცხადებს, რომ უბრალოდ ჩრდილში გადასვლა უნდა, თუმცა, ყველაფერი ასე ცხადად არ არის. 
შონ უოკერი ასევე წერს, რომ საქართველოს მილიარდერ პრემიერს უკვირს მოსაზრება, თითქოს კრიტიკისადმი მგრძნობიარეა. 

არსებობს გამოკითხვის ოქმი, სადაც დაფიქსირებულია, რომ პირველი პატიმრობისას გოგა ძველაიას თვითმკვლელობისკენ მიდრეკილება ჰქონდა , - ამის შესახებ "ინტერპრესნიუსს" ახალგაზრდა იურისტთა ასოციაციის თავმჯდომარემ კახა კოჟორიძემ განუცხადა. 
"გვაქვს ინფორმაცია, რომ როდესაც გოგი ძველაია პირველად იმყოფებოდა სასჯელაღსრულების დაწესებულებაში, სოციალურმა მუშაკმა მასთან გამოკითხვა აწარმოა, სადაც ამ გამოკითხვაში - აქვს თუ არა მიდრეკილება თვითმკვლელობისკენ? - პასუხი იყო გაცემული, რომ კი, აქვს", - განაცხადა კოჟორიძემ. 

"თავისუფალი საქართველო" საპრეზიდენტო არჩევნებში მხარს ნინო ბურჯანაძეს უჭერს. ამის შესახებ "ინტერპრესნიუსს" "თავისუფალი საქართველოდან" აცნობეს. 
"27 ოქტომბრის საპრეზიდენტო არჩევნების მოახლოებასთან ერთად, ნათელი ხდება, რომ არსებული ხელისუფლება ყველანაირად ცდილობს მეორე ადგილზე გაიყვანოს "ნაციონალური მოძრაობის" კანდიდატი დავით ბაქრაძე. ამის შესახებ ღიად საუბრობს პრემიერ-მინისტრი და აფინანსებს შესაბამის სოციოლოგიურ კვლევებს.

სახალხო დამცველი შინაგან საქმეთა მინისტრს, ირაკლი ღარიბაშვილს მიმართავს, 17 ოქტომბერს საგარეჯოს პოლიციის სამმართველოში მომხდარი ინციდენტის მოკვლევა პირად კონტროლზე აიყვანოს და შესაბამისი ღონისძიებები გაატაროს.
უჩა ნანუაშვილი საგარეჯოს პოლიციის თანამშრომლების მხრიდან კანონის უხეშ დარღვევაზე, ხოლო შინაგან საქმეთა სამინისტროს საზოგადოებასთან ურთიერთობის მთავარი სამმართველოს მიერ "არაკვალიფიციური და უპასუხისმგებლო" განცხადებების გაკეთებაზე საუბრობს. 

საქართველოს პრემიერ-მინისტრმა ბიძინა ივანიშვილმა უარყო გავრცელებული ხმები იმის თაობაზე, რომ თანამდებობიდან წასვლის შემდეგ ქვეყანის მართვას კულისებიდან გააგრძელებს. ამის შესახებ საქართველოს პრემიერმა "ფრანს პრესისთვის" მიცემულ ინტერვიუში განაცხადა. 
"კულისებიდან მმართველობაში ლოგიკას ვერ ვხედავ. არ ვაპირებ იქიდან მოქმედებას", - აღნიშნა ბიძინა ივანიშვილმა. 
ფრანგულ სააგენტოსთან საუბრისას საქართველოს პრემიერ-მინისტრმა ასევე განაცხადა, რომ მიხეილ სააკაშვილი პოლიტიკური გვამია და არ გამორიცხავს, რომ საპრეზიდენტო ვადის ამოწურვის შემდეგ ის სასამართლოს წინაშე წარსდგეს.